ტრენინგის მეოთხე დღე

ტრენინგის მეოთხე დღე შესწავლილი მასალის გამეორებით დაიწყო. შემდეგ განვიხილეთ შეფასების სხვადასხვა მეთოდი და ტრენერი გვესაუბრა შეფასების სტრატეგიებზე, თუ როგორ შევაფასოთ პროექტი. გავეცანით დროში გაწერილ შეფასების გეგმას, თუ რა მიზანს ვისახავთ შეფასებისას, რომელ მეთოდს ვიყენებთ და რა არის შეფასების ინსტრუმენტები.  როგორ უნდა გავგეგმოთ შეფასება პროექტის მიმდინარეობის პროცესში  (დასაწყისში, მიმდინარეობის დროს და დასრულების შემდეგ). როგორც ყოველთვის, ქალბატონი ქეთი ცერაძის რჩევები არის პრაქტიკული და მუშაობის პროცესში გამოსადეგი, დაუზარელი ტრენერი ყურადღებით ეკიდება თითოეული მასწავლებლის საჭიროებას და ტრენინგი უშუალო გარემოში და საინტერესოდ მიმდინარეობს.
ტრენინგის ბოლოს ვისწავლეთ პროექტის პორტფოლიოს პრეზენტაცია, ავაწყვეთ სლაიდები, მოვუნახეთ დიზაინი, სურათები და შესაბამისი ტექსტები, რომლებიც პროექტის მსვლელობას ასახავს. ტრენერმა გვაჩვენა სხვადასხვა პროგრამებში აწყობილი საინტერესო პრეზენტაციები და გვესაუბრა პრეზენტაციის შეაფასების კრიტერიუმების შესახებ. მადლობა ქალბატონ ქეთის საინტერესო ტრენინგისათვის.

ტრენინგის მესამე დღე

პროექტის მესამე დღეს გავიმეორეთ უკვე შესწავლილი მასალა და ვიმუშავეთ პროექტის გეგმაზე.  სასწავლო პროექტის დაგეგმვისას ტრენერმა გაგვიმარტა, თუ როგორ უნდა  განვსაზღვროთ მიზნები სტანდარტებთან შესაბამისად. ვიმუშავეთ მიმართულების მიმცემ საკვანძო კითხვებზე. საინტერესო იყო ბუნდოვანი და კარგი მიზნების მაგალითებზე დაკვირვება, რაც გამოგვადგა მიზნების განსაზღვრასა და კითხვების ჩამოყალიბებაში. ასევე, გავეცანით განახლებულ ბლუმის ტაქსონომიას, რომლის გათვალისწინებითაც შევადგინეთ ზოგადი, თემატური და შინაარსობრივი კითხვები. ტრენინგი, როგორც ყოველთვის, საინტერესო და შედეგიანი იყო. 

ტრენინგის მეორე დღე

ტრენინგის მეორე დღე საშინაო დავალებისა და პროექტების მიმოხილვით დაიწყო. შემდეგ გავიხსენეთ ტრენინგის პირველ დღეს შესწავლილი საკითხები.  შევისწავლეთ პუბლიკაციის მომზადება პროექტებით სწავლებისას და ბუკლეტის მომზადება ვორდში. შევქმენით სარეკლამო ბუკლეტები ჩვენ მიერ შერჩეული პროექტებისათვის. გავეცანით ბლოგის მდგომარების სამ სახეს, რედაქტირების პროცესს და ბევრ საინტერესო ნიუანსს, რომლებიც შეკითხვების სახით ჩნდებოდა მუშაობის პროცესში. ასევე, გავიხსენეთ, როგორ ხდება დაზიპვა და განზიპვა.  ტრენინგი, როგორც ყოველთვის, საინტერესო და ნაყოფიერი იყო. 

ტრენინგის [პირველი დღე

ინტელის ტრენინგის პირველმა დღემ საინტერესოდ ჩაიარა. შეხვედრა დაიწყო გაცნობით, ტრენინგის მონაწილეებმა,  ქალბატონი ქეთი ცერაძის დახმარებით, გავიხსენეთ მეორე დონის ტრენინგზე შესწავლილი საკითხები. ტრენერმა გაგვაცნო ინტელის  სასწავლო კურსის ძირითადი მიზნები და საკითხები, გავეცანით გზამკვლევს (პროექტებით სწავლება). ტრენერმა თავისი ბლოგის დახმარებით გვაჩვენა სარეკლამო რგოლი, პროექტით სწავლება ამერიკის ერთ-ერთ სკოლაში,რაც საკმაოდ შთამბეჭდავი იყო. შევქმენით პორტფოლიოს საქაღალდე, რომელშიც შევინახეთ საჭირო რესურსები, პროექტის გეგმის შაბლონი.  დავათვალიერეთ უკვე შექმნილი და განხორციელებული პროექტები. ვისაუბრეთ პროექტის აქტუალობასა და მნიშვნელობაზე, როგორ უნდა შევარჩიოთ პროექტისათვის თემა, რა საჭიროებებსა და მიზნებს უნდა ისახავდეს მასწავლებელი თემის შერჩევისას, ესგ-ს რომელი სტანდარტის მიღწევას ცდილობს, მოსწავლეებში რა უნარების განვითარებას ემსახურება და ა.შ. შემდეგ ტრენინგის მონაწილეებმა შევქმენით ბლოგები "ინტელის სასწავლო კურსი", რომელზეც ტრენინგის მსვლელობა აისახება და თან ბლოგის შექმნაში დავხელოვნდებით.  საშინაო დავალებად გვაქვს მოსაფიქრებელი პროქტის თემა, რომელზეც ვიმუშავებთ ტრენინგის დროს და შემდეგ განვახორციელებთ სკოლაში. 

მადლობა ტრენერს საინტერესოდ ჩატარებული სამუშაოსათვის, რომელიც აუცილებლად გამოგვადგება პრაქტიკაში. პირადად მე პირველად არ ვარ ქეთევან ცერაძის ტრენინგზე და შემიძლია ვთქვა, რომ იგი ცოდნასა და ენერგიას არ იშურებს, რათა ციფრული რესურსებისა და თანამედროვე ტექნოლოგიების მნიშვნელობა ყველა მასწავლებელმა გაითავისოს და  გამოიყენოს გაკვეთილებზე.